عشرة نصايح مهمة لأي أم جديدة لازم تعرفها :

1 - الطفل مبيبطلش عياط مهما عملتي فبالتالي لما جوزك يقولك اعمليله شاي عشان يشتغل سيبي الطفل في أي مصيبة واعمليله الشاي وإلا جوزك مش هايعمل شغله وهايتطرد منه ويفلس ويدمن ويخونك مع واحدة اسمها يارا على الأغلب !

2- كل الأطفال أول ما بيتولدوا شكلهم وحش وده مش بالضرورة معناه إنهم طالعين لأبوهم !

 3- لأ مش الأكل اللي بيخلص من التلاجة شيطاني .. الرضاعة بتجوع وكل الناس عارفة ده !

4- الطفل عارف انتي بتنامي امتى وبتاكلي امتى وبيوفر صريخه للوقت ده .. اياكي تخلي ابنك أو بنتك يعرف انتي هاتعملي ايه امتى .. عامليه كجاسوس !

 5 - أيوه طفلك أحلى من كل الأطفال التانيين والمفروض ياخدوه يعملوا بيه إعلانات في التلفزيون بس هي الرقابة للاسف اللي بتمنع عرض الحاجات المرعبة على التلفزيون !

 6 - كل الأطفال عندها حول طبيعي بيروح مع الوقت .. محاولة عدل عين الطفل بصباعك مش مفيدة ومضرة ببشرة الأصابع !

7- الطفل بيحط أي حاجة في بقه وأول حاجة بيدور عليها لما بيتحرك هي فيش الكهربا اللي في الشقة .. متيضعيش وقتك في محاولة حمايته وسيبيه يتعلم بالتجربة أو يكون عبرة وعظة لغيره من الأطفال !

 8 - زي ما طفلك بيجوع جوزك كمان بيجوع .. حاولي متنسيش الحقيقة دي وإلا هاتكتشفي فجأة حلاوة طبيخ يارا خصوصًا لما جوزك يبدأ يتخن فجأة !

9 - بطلي تغني لطفلك بصوت عالي .. كونك أم لا يعني بالضرورة إن اللي حواليكي أصيبوا بالصمم !

 10 - وأخيرًا بطلي تقولي لجوزك بكراهية على كل حاجه انت السبب .. متنسيش إنه ضحى بيارا عشانك !