اتشال مبارك ..جه طنطاوى ..
غار طنطاوى..جه الإخوان ..
غاروا الإخوان ....رجع العسكر
من دقن لكاب .. ومن كاب لدقن ...
ولسه الوطن مدبوح..ولسه الشباب بيموت
ولسه الثورة بتتقتل..ورجع الشعب تانى للعبودية
الإخوان بيقولوا ان هم الثوار بعد ما ساهموا
فى قتل الثورة و الثوار
والثوار اغلبهم فى القبور او فى المعتقلات ..
واللى نزلوا الميدان من جيلى اغلبهم اترعبوا
من فترة حكم الإخوان و رجعوا وقالوا : احنا اسفين يا صلاح نبوس ايدك يا صلاح عايزين استقرار
عايزين نرجع تانى الزريبة ناكل و نشرب حتى لو
لقمة مسرطنه مغموسة بذل و مهانة
حاننسى انك اهنتنا يا صلاح 60 سنة
حانعمل نفسنا كأننا عندنا أمل انك مش صلاح وانك
واحد تانى
حانخدع نفسنا و حانحارب مستقبل اولادنا
عشان يتعلموا الادب زى ما اتعلمناه احنا
ويركعوا زى ما ركعنا احنا
احنا مين ؟
احنا الخوافين اللى فرحوا بالثورة فى الاول
و لما لقوا العملية قلبت جد سارعوا بالركوع والندم وبعد ما هللنا مع اولادنا بقينا
نقول عليهم نوشتاء سبوبة
وان جيتم للحق .. احنا جيل السبوبة .
ظلمناكم ياولادنا مرتين ..
مرة لما جبناكم للحياة فى البلد دى
ومرة لما قلنا عليكم عيال مش متربية عشان بقيتم
تقولوا مصطلحات عجيبة احنا ما اتربيناش عليها
حرية ؟ كرامة انسانية ؟!!
ايه الالفاظ الأبيحة دى ياض انت و هو وهى ؟
انتوا عايزين الوطن يضيع ولا ايه ؟
انتم جبتوا الكلام ده من فين ؟
انتوا اكيد قابضين من برة !!
صحيح جيل قليل الادب .. واحنا الادب كله
احنا متربيين بنعرف نركع و نسجد ونسبح .. مش
لله الرحمن الرحيم و بس .. لا .. لكل حاكم بأمر الله كمان .
يقول كفتة نقول امين
تقولوا كرامة .. تبقوا قابضين .
ياخسارة تربيتنا فيكم
اتفوا ..... بس مش عليكم ...
اتفوا علينا .
No comments:
Post a Comment