ياشعب, بطل الاندفاع العاطفى بتاعك ده فى اختيارك للرئيس....

 ‎مدحت عثمان‎

ظهر على الساحة مصطفى حجازى فى المؤتمر الصحفى الذى عقد, فكعادة شعبنا العاطفى اللى بيشبط فى كل واحد جديد يظهر على الساحة و عايزه يبقى رئيس مصر , ظهرت النداءات تطالب به رئيسا, كوميديا.... ..

الشعب المصرى ده عامل Like a Kid in a Toy's Store ,كل ما يشوف لعبة يشبط فيها, و كل ما يشوف واحد يقول هو ده اللى ينفع رئيس جمهورية, زى المراهق اللى كل مايشوف بنت حلوة يبقى عايز يخطبها و يتجوزها من غير ما يعرف حاجة عن اصلها و فصلها. مرة زويل و مرة البرادعى و مرة شفيق و اخيرا مرسى والآن السيسى و كلها اختيارات عاطفية متسرعة ليست مبنية على اى اساس او مواصفات محددة للمرشح لرئاسة الجمهورية.....

What are your criteria for President

ما هو مش معقول نكون بهذه الضحالة فى التفكير و اسلوب اختيار رئيس, و فى الآخر نجيب هبتل زى مرسى و جماعته يحكمونا. السيسى لا يصلح الا ضابط جيش, تعليمه و خبرته, و للأسف, الشعب المصرى عاطفى و متسرع و يحب يأله الفرد و يعمل منه فرعون ليعبده و بعدها يستعبده.....

يا جماعة حددوا مواصفات الرئيس اولا و اعلنوها, بالضبط كما تعملوا اعلانات الوظائف الخالية, مثلا......

مطلوب رئيس, حسن المظهر, يجيد لغة اجنبية او اكثر, نظيف اليد, حسن السمعة, ملم بالسياسة الخارجية و استراتيجيات مصر فى العالم العربى وافريقيا وآسيا, والتوازنات الدولية, عنده تاريخ من الانجازات و قدرة على ادارة فريق عمل من 100 فرد تقريبا يتكون من وزراء و كبار موظفى الدولة, عنده رؤية مستقبلية لما سيحقق لمصر اثناء توليه الفترة او فترتى الرئاسة اذا اثبت كفاءة فى الفترة الاولى, عنده حلول مقترحة للمشاكل والازمات التى تمر بها مصر و جدول زمنى لتنفيذ هذه الحلول, رؤية شاملة و مقترحات لتحديث و اعادة هيكلة اجهزة الدولة لتخفيف معاناة المواطنين فى التعامل مع اجهزة الدولة المختلفة, ليس له اى انتماءات لجماعات يمينية او يسارية متطرفة او موالية لتنظيمات دولية, وطنى, شجاع و قادر على اتخاذ قرارات حاسمة و جريئة - على من تتوافر فيه على الاقل هذه الشروط ان يتقدم للشعب المصرى بمؤهلاته و فريق العمل الذى سيقوم على خدمة الشعب المصرى والعمل على تخفيف معاناته و رفع مستوى المعيشة لجميع طبقات الشعب....

آدى مواصفات, اللى عايز يزود عليها يتفضل, و ابدأوا من الآن تعدوا للحملة الانتخابية و توعية الناخبين لتكون الانتخابات على اساس عقلانى مش اندفاع عاطفى و زيت و سكر تدفعوا ثمنه غالى من حرياتكم و دمائكم و ترجعوا تقولوا ياريت اللى جرى ما كان و نبقى مضحكة امام العالم, نخلع رئيسين فى سنتين, و صحيح يستاهلوا الخلع و شوية فيهم الخلع, ده لازم ياخدوا بالجزمة, و لكن الغلط من الشعب, و كما جاء فى الجديث النبوى الشريف: كيفما تكونوا يولى عليكم...صدق رسول الله عليه الصلاة والسلام, انتم اللى بتجيبوه لنفسكم يا شعب, فخلوا بالكم, الخلع غالى, ندفع ثمنه دم و دمار, ده مش خلع زوج فى محكمة, افيقو يرحمكم الله....