نصائح زوجية

من النصائح الزوجية الكارثية اللي دايماً بنسمعها انه في حالة حدوث خناقة بين الزوجين "خدوا بريك و 

ابعدوا عن بعض عشان تهدوا شوية" فالست تقفل على نفسها باب اوضتها و الراجل ينزل القهوة يشد حجر تفاح و يتفرج على اعادة ماتش ممل في البوندزليجا.

مبدأيا معرفش مين الجحش اللي تخيل في يوم من الأيام ان الست لما تسيبها شوية لوحدها و هي زعلانة هتهدا بقى و تراجع نفسها (بعقلانية) و( منطق) و كدا .. بالعكس دي هتفضل تهري في نفسها و تفتكرلك القديم و الجديد و هتفضل تعد للمعركة و تحفظ الكلام اللي هتقولهولك لما ترجع و تذاكر ردودك في خناقات سابقة و تحضر لسيناريوهات التصعيد و ما إلى ذلك من تكتيكات حروب الجيل الخامس و طبقاً لبروتوكولات حكماء صهيون ..فيما يكون الراجل اللي على القهوة نسي اساساً هم اتخانقوا ليه بمنتهى السذاجة و البلادة اللي في الدنيا !

نتيجة لكل دا طبعاً الخناقة الحقيقية بتبدأ بعد الهدنة دي و كل دا و عداد النكد بيعد عليكم و على الأقل خالص هتباتوا ليلة متنكدين ان ما كانش اكتر.

فالحل باختصار انكم لو اتخانقتم كملوا خناقتكم to the breaking point اللي هي غالباً بتكون عياط الست .. و بعدين من هنا الراجل بيعرف يلم الدور ازاي .. و كل راجل و له اسلوبه . و بكدا يبقى نزلنا بزمن النكد و المشكلة من يومين و ليلة لنص ساعة على الاكثر ..و الموضوع انتهى على خير بدون تطبيق النصيحة الزبالة المذكورة أعلاه دي.

تلاحظ 3 حاجات من كلامي .. واحد اني ما تطرقتكش اساساً مين الغلطان و سبب المشكلة .. انت عبيط يا محمد يا رمزي ؟ الستات رضي الله عنهن ما بيغلطوش.. و ان غلطوا ما بيعترفوش و ان اعترفوا ما بيعتذروش و ان اعتذروا ما بيقتنعوش و بيبقى اعتذار شكلي يحرق دمك اكتر و حتى دا نادراً ما بيحدث اساساً !

الحاجة التانية اللي ما تكلمتش عنها اسلوب الراجل في لم الدور في نهاية الخناقة .. دي تختلف من راجل لراجل و قدرة الراجل على التحمل و ظبط النفس و دي بتفرق من شخص لأخر زي ما قلت.

الشئ التالت و الأخير و هو الهدف الحقيقي من كل الكلام دا و أهم شئ على الإطلاق هو انك ما تسيبش الست لوحدها سواء في وقت السلم او ساعة الحرب .. لازم تكون جنبها في كل لحظة عشان تحاول تتوقع الهجوم هييجي منين .. و ان سبتها لازم تخلي عقلها شغال و بيهري في أي شئ زي الـMalware ما بيعمل في الـCPU ..لأن لو للحظة الCPU Usage قلت عندها هتبدأ تفكر فيك و دا مش حلو عشانك.. دا موضوع كبير يطول شرحه و هاتكلم عليه وقت تاني ان شاء الله.