بقلم : سلمى سامي

امل علم الدين مرات جورج كلوني كانت قالت في تصريح انها عاوزه تجيب طفل عشان مش حابه تخلف وهي عجوزه ، *أمل عندها 37 سنه* .

بنات كتير تعليقاتهم على الخبر كانت *وده على اساس انها صغيره* *ماهي عجوزه اصلاً* وهكذا.

بنات كتير مننا في اول العشرينات وكل همها في الدنيا انا لازم الحق اتخطب قبل ما اكبر واعنس وقطر الجواز يفوتني.

بنات كتير بيبقوا فاكرين الجامعه المكان اللي هيتجوزوا منه *ملتقى العرسان* ولو اتخرجوا من غير عريس كده فرصتهم هتقل أو تنعدم مع ان الجامعه المكان اللي المفروض يستغلوه عشان يتعلموا صح.

بنات كتير بيفكروا ان الجواز هو الحل الامثل للهروب من تحكمات الاهل ومع اول عريس ميعرفوهوش بيمسكوا فيه بايديهم وسنانهم مع انهم ممكن يكونوا مرتبطين او في قصة حب بس بيحطوا كل ده ع جمب ومبيشوفوش غير الحياه الورديه بس للاسف الشريك الغلط معناه سجن اكبر وحياه كلها كلاكيع وعقد وتحكمات.

بنات كتير بيبقى محور حياتها الجواز وبتشوفه اكبر انجاز ممكن تعمله ولا بتفكر ازاي تشتغل على نفسها وتطورها وتثبت نفسها من خلال شغل او دراسه او اي نشاط وبيبقى كل همها ازاي تغيظ صحباتها بالعريس والقاعه والشبكه والشقه والهدايا.

بنات كتير بردو لما بيقربوا على سن الـ 30 بيجيلهم حاله من الهلع والتوتر وممكن يتجوزوا *رجل كنبه* بحجة ضل راجل ولا ضل حيطه.

فرق التفكير ده هو اللي خلى صاحبة الـ 37 سنه ناشطه حقوقيه وكاتبه وحاصله على دراسات متخصصه في القانون الدولي والجنائي ومستشاره قانونيه ومحاميه أمام المحاكم العليا في لندن.

وذوات الـ 20 سنه واقل واكثر مومياوات كل همهم الخروج والفسح والموضه متعرفش تفرقهم عن بعض، عقولهم مخوخه وشخصياتهم بهتانه ولو عرفوا معلومتين بتبقى آخر الدنيا ولو جابت تقدير في نظام تعليمي فاشل واشتغلت كوسه في مؤسسه فاسده في دوله من دول العالم التالت تفتكر نفسها حققت نجاحات عظيمه وتبدأ تدور على شخص في نفس مستوى نجاحاتها اللامتناهيه.

وهو ده اللي بيخليكوا تختاروا شريك حياه بائس وتعيشوا حياه تعيسه وتجيبوا عيال شبهكم متعرفوش تربوها لان معندكوش اي حاجه تنقلوهالهم وفي الاخر بيطلعوا سطحيين زيكم وده نفس السبب يا بنات اللي بيخليكم عند 37 سنه فعلا عواجيز.

المجتمع والناس والاهل بيعجزونا كتير اه بس احنا لا ضحايا ولا كائنات ضعيفه مسلوبة الاراده والهويه عشان ميبقاش لينا قرار في حياتنا احنا في اغلب الاوقات بنصنع حالة الاستبداد اللي بنعيش فيها دي بنفسنا بتخاذلنا وجهلنا.

نسبه كبيره من الرجاله اللي بتسقف دلوقتي على فكره انتو اول ناس ببتجوزوا البنات اللي من النوعيه دي وبتشجعوهم على التمادي عشان بتخافوا ترتبطوا بالبنت اللي ليها طموح وهدف وكيان عشان ما يطغاش على شخصكم ولو حصل وارتبطوا ببنت من مثيلات امل بتحاولوا بكل ما اوتيتم من قوه تخلوها شبه البنت الفارغه التافهه لحد ما تكرهوها او هي تكره نفسها.