أصل مشكلة إنقطاع الكهرباء

وليد شحاته

الى كل اصدقائى اللى بيشتكوا من انقطاع الكهرباء وبحكم عملى وموقعى فى وزارة الكهرباء وجدت انى لازم اوضح للجميع اصل المشكلة ..

اولا : شبكة الكهرباء المصرية قدرتها 31000 ميجا وات .. القدرة القصوى فعليا والتى يمكن الحصول عليها هى 28000 ميجا وات وده بسبب خروج بعض الوحدات للصيانه واعطال النقل وضغط الغاز الطبيعى الذى تعمل به الوحدات .

ثانيا : احمال مصر فى وقت الذروة هى 30000 ميجا وات بعجز يقدر ب 2000 ميجا وات فى اشهر الصيف فقط لمده زمنيه حوالى 4 ساعات وغالبا المفروض سكان المدن الكبرى لن تحس بهذا العجز وحتى المناطق اللى بيتم عليها التخفيض مقابل العجز وعن طريق برامج مراكز مراكز التحكم الاقليمى والتحكم القومى لن ينقطع عنها التيار لمده تزيد عن 20 دقيقه .. واغلبية المصريين لن يحسوا بهذا العجز ..

امال ايه المشكله ..

المشكله تتكون من عدة اسباب :

1.   وقود معظم وحدات التوليد هو الغاز الطبيعى و السولار والمازوت ولكن فى حاله تشغيل الوحدة بالغاز تكون كفائتها 95% اما السولار 80% والمازوت حوالة 60% يعنى لو وحده 300 ميجا اشتغلت غاز تدى 270 ميجا ولو سولار 240 ميجا ولو مازوت 180 ميجا .. المشكله ان فى عجز فى الغاز والسولار .. فالوحدات شغالة مازوت .. ودى ادى الى نقص كفاءة الشبكه وخفض اجماليها من 28000 ميجا الى 21000 ميجا فقط يعنى ربع الكفاءة ضاع بسبب عدم توفر الغاز الطبيعى والسولار .

2.   التوليد ده بيتنقل الى محطات المحولات من خلال ابراج النقل (الابراج العاليه) جهد 500 و220 و66 كيلوفولت اللى للاسف مستهدفه بشكل يومى واللى انتم بتشفوه فى التيلفزيون مش حاجه جنب اللى انا اعرفه ومقدرش احكيه .. يعنى حتى التوليد اللى نقص 25% مش قادر انقله كامل.

3.   بعد ما تتنقل الكهرباء بجهد 500 و220 و66 كيلوفولت لمحطات المحولات تخفضها اللى 11 كيلو فولت وتطلع من محطات المحولات اللى اللوح الموجوده داخل المدن واللى بدورها بتنقلها بمفاتيح اللى اكشاك المحولات الرئيسية ثم الفرعية اللى فى الشوارع ثم للبيوت . وطبعا فى اكتر من 300 محول رئيسى وفرعى اتحرقوا من بعد رمضان

4.   كل ده ادى اللى ان القدرة اللى واصله للاحمال حوالى 18000 ميجا وات بعجز تقريبا 40 % وده يؤدى الى قطع الكهرباء مدة من خمس لست ساعات يوميا فى الفتره اللى فيها المشكلة من 11 صباحا وحتى 2 صباحا وبناء على التعليمات الكهرباء بتتقطع ساعه وتيجى ساعه ولو اتقطعت اكتر من ساعه عندك اعرف ان دى صيانه مش تخفيض لان حد استهدف محول رئيسى فى منطقتك .

نقص الوقود يتحمل 70% من المشكله و الاعمال التخريبية تتحمل 30 % منها .

علشان كدة فى حاله نجاح الوزارة فى تامين الوقود ستنخفض ساعات الانقطاع الى ساعة ونصف يوميا .. طبعا اذا استمر معدل التخريب زى ماهو ومازدش .. وطبعا وللامانه كل اعمال التخريب بتستهدف خطوط واماكن بعينها مهمه للغايه لا يعلمها الا الفنيين والعاملين بالوزارة وده يرى بالعين المجرده مت طبيعة اعمال التخريب ويمكن اللى تداولته الصحافه عن تورط اخوان عاملين بالوزاره حقيقى والوزارة بالتعاون مع الداخليه بدات تحصر العناصر المشكوك فيها .

احب اضيف ان المشكلة دى تقريبا هتختفى فى منتصف او اواخر شهر سبتمبر لما الجو يبرد لان الاحمال بتنخفض تدريجيا بسبب ان استخدام التكيفات بيقل لحد ما توصل ل 19000 ميجا وات فى الشتاء .

ارجو ان اكون وضحت الموضوع .. وشكرا