فى ذكرى ثورة 23 يوليو Mahmoud Ibrahim....

الجماعة إللى نازلين شتيمة فى ثورة يوليو ناس لها العجب....ممكن أفهم إن فيه ناس بتكره ثورة 52, وتكره عبد الناصر لأسباب شخصية, زى من تبقى من أسرة محمد على, وبقايا أسر باشوات وأعيان مصر فى العصر الملكى, من كبار ملاك الأراضى من الإقطاعيين, وكبار تجار القطن وأصحاب رؤوس الأموال, والمستفيدين من الاحتلال البريطانى...,اضيف إلى هؤلاء الكارهين جماعة الإخوان المسلمين الذين تعرضول للسجون والمعتقلات وحرموا من تحقيق حلمهم فى الوصول إلى الحكم بعد الثورة.....أستطيع أن أفهم أسباب كل هؤلاء لكراهية ثورة 52 , وكراهية عبد الناصر....

إللى باستغربله إن واحد إتولد فى عصر مبارك أو بالكتير فى عصر السادات يطلع يشتم فى ثورة يوليو, ويتحسر على أيام الملكية...هوه إنت يا أخى كنت شفت أيام الملكية واللا أيام عبد الناصر علشان تحكم على ده واللا على ده, وتقعد تهلفط بكلم عبيط وأهبل ما تسمعوش غير من النسوان إللى قاعدين على شلت, أو من شلة حشاشين كل واحد فيها عاوز يثبت إنه كبير وبيفهم وله فى السياسة والاقتصاد والبتنجان ....كون إنك عايش أيام خره, واللى بيحكم البلد عصابة وسخة من اللصوص والأفاقين والعملاء مش معناه أبدا إن كل العسكر اللى قاموا بثورة 52 كانوا من نفس العينة الوسخة إللى بتحكم النهاردة, لأن لو ضباط 52 كانوا من نفس النوعية الوسخة ما كانوش قاموا بالثورة وعرضوا نفسهم لحبل المشنقة, وكانوا ممكن بدل ما يعرضوا نفسهم للخطر يعيشوا فى نعيم الملكية وياخدوا لقب الباشوية أول ما يوصلوا لرتبة لواء.

المؤكد إن كل واحد بيطلع يشتم فى ثورة يوليو, غير الناس إللى أضيروا منها, هو إنسان لا يعرف عن أى شئ يتكلم لأنه بيتكلم عن عن حاجة ولا عاشها ولا شافها وكل معلوماته جابها من مسلسل "الملك فاروق" أو "الملكة نازلى" أو "حارة اليهود" ...أو أى كلام فاضى كتبه واحد سطحى أو مألفه إنسان إنتهازى ووصولى, أو شخصية مريضة وقبيحة زى "لميس جابر", وييجى على الفيسبوك يكتب بوستات ويعلق تعليقات يترحم فيها على أيام الملكية, ويلعن سنسفيل ثورة يوليو واللى جابوا ثورة يوليو, مع إنك لو دورت على حكايته ها تلاقيه إتعلم فى مدارس وجامعات ببلاش بفضل ثورة يوليو, واتعين فى وظيفة عن طريق القوى العاملة لأن دولة ثورة يوليو كانت ملتزمة بتوفير العمل لكل إنسان قادر عليه بدون واسطة ولا محسوبية, يعنى لو كان وكيل نيابة واللا قاضى واللا ظابط فى البوليس واللا الجيش يبقى وصل لمنصبه بفضل النظام اللى كان سائد, نظام العدالة والمساواة بين ولاد البواب وأولاد الوزير فى الحقوق والفرص المتاحة للجميع..

يقولك عبد الناصر جابلنا الهزيمة سنة 67, طيب يا فالح ماهو بنفس المنطق الملك فاروق جابلنا هزيمة 48...

الجماعة دول مفيش عندهم فهم للتاريخ ولا الظروف الدولية ولا الأحوال الاجتماعية إللى مرت بيها مصر فى العصر الملكى ولا العصر اللى قبله ولا إللى بعده, ولا يدركون مؤثرات الغزوة الصهيونية للمنطقة , وتلاقيهم بيتكلموا عن خطر إيران والمد الشيعى إللى شايفين إنه أخطر من إسرائيل والمد الصهيونى.

عاوز أقول للجماعة دول, إتلهوا على عينكم وروحوا دوروا كتاب تقروه جايز عقولكم تتنور وتبدأوا تفهمو سبب المصيبة إللى البلد فيها والحفرة إللى وقعنا قيها بعد ما مات عبد الناصر واستلم الحكم واحد خسيس كان كل أحلامه إنه يعيش عيشة الملوك, وساعتها جايز تفهموا إن سبب البلاوى مش ثورة 52 لكن حاجات تانية كتير من بينها إنكم عاوزين ترموا خيبتكم على حدث عظيم فات عليه 63 سنة, وقائد أسطورى مات بقاله 45 سنة, والاتنين رغم إنهم ما فاضلش منهم غير أثار وذكريات قليلة إلا إن هناك قوى كبرى وقوى محلية مازالت تشعر بالخطر من مجرد تلك الذكريات القليلة الباقية.ومازالوا بيحاربونها ويفترون عليها كل يوم.

عاوز أقول للجماعة دول كمان, مادمتم مش قادرين أو مش عاوزين تفهمو التاريخ, بطلوا تلعنوا إللى سبقوكم لأنهم سواء أحسنوا أو أفسدوا حسابهم عند ربهم, وما تبقوش زى إللى ربنا قال عليهم "قَالَ ادْخُلُوا فِي أُمَمٍ قَدْ خَلَتْ مِن قَبْلِكُم مِّنَ الْجِنِّ وَالْإِنسِ فِي النَّارِ ۖ كُلَّمَا دَخَلَتْ أُمَّةٌ لَّعَنَتْ أُخْتَهَا" .

ورونا شطارتكم وعلى الله تفلحوا فى الدنيا وفى الآخرة..