مصر العظمى وتزوير التاريخ.

قناة " القاهرة والناس" بتستغل السلام الوطنى المصري فى العهد الملكى "إسلمى يا مصر" ومركبة عليه صور وفيديوهات لمصر الملكية جايبة فيهم شوارع وسط البلد والأجانب محفلطين وملمعين ومحلات شيكوريل وبنزايون وريفولى وصيدناوى ، وكاتبة عليهم معلومات كلها غير صحيحة ، منها على سبيل المثال مصر كانت مداينة بريطانيا فى الحرب العالمية الأولى بـ29 مليار دولار ، حدود مصر الملكية كانت تشمل السودان وجزء من ليبيا وجزء من تشاد وجزء من أوغندا ، اليابان كانت بتدرس تجربة نهضة مصر ، معدل البطالة كان 2%!! الموضة كانت بتنزل مصر قبل أوروبا.

وقامت بتسمية كل ده مصر العظمى من 1805 -1952 !!!

اللى يشوف الأغنية الدعائية دى هيقول لما مصر كانت جنة ولا جنة عدن كده ،مين الشياطين اللى انقلبوا على الملكية وأطاحوا بها ، وأخرجوا المصريين من جنتها؟!!

وما الداعى لثورة يوليو وسر التأييد الشعبي الجارف لها؟!!

مصر العظمى من 1805-1952 اللى شهدت محاربة محمد على فى الجزيرة العربية واليونان كمرتزق لحساب السلطان العثمانى ، مصر العظمى اللى شعبها أطلق على محمد على وهو أفضل واحد من حكام أسرته أسم "ظالم باشا" ، مصر العظمى اللى عظمتها الخارجية كانت قصيرة ولم تتجاوز عقد من 1830 حتى معاهدة لندن 1840 !! مصر العظمى اللى محمد على حولها لتكية لأسرته من بعده ، مصر العظمى اللى مات من شعبها أكثر من 150 ألف مصري فى حفر قناة السويس بالسخرة!!

مصر العظمى اللى حاكمها سعيد باشا حب يجامل نابليون الثالث فأرسل كتيبة من جيشها تحارب لصالحه فى المكسيك!! مصر العظمى اللى وقعت تحت إدارة بريطانية فرنسية بسبب ديون اسماعيل اللى ساب شعبها يموت من الجوع والبلهارسيا والكوليرا وبنى أوبرا وخطط شوارع وسط القاهرة زى باريس ، مصر العظمى اللى عملت حفلة أسطورية فى افتتاح القناة على جثث 150 ألف مصري علشان اسماعيل كان مغرم بأوجيني ، مصر العظمى اللى اسماعيل حب يعمل إمبراطورية له فى أفريقيا فزج بجيشها فى حروب مع الحبشة أبيد فيها الجيش وخلقت عداء تاريخى لا ينتهى مع الأحباش وأفلست خزانة مصر وأثقلتها بالقروض، مصر العظمى التى تم احتلالها عام 1882 من بريطانيا وفضلت محتلة لأكثر من 70 سنة، مصر العظمى اللى بعتت شبابها سخرة لخدمة حروب بريطانيا فى الحرب العالمية الأولى ، مصر العظمى اللى حاكمها عباس حلمى الثانى تنازل فيها عن العقبة للأدرن وعن جغبوب لليبيا مقابل أن يجلسه الإنجليز على العرش ، مصر العظمى اللى خط الحدود بين مصر والسودان تم إقراره سنة 1899 ، مصر العظمى اللى جيشها تم طرده من السودان سنة 1924 ،مصر العظمى اللى حكمها مقامر ومكروه حتى من أسرته زى فؤاد الأول اللى اتجوز نازلى غصب ، وخلفوا فاروق قبل ميعاده فبيرم التونسي كتب لهم قصيدته القرع السلطانى بتاعة البنت ماشية من زمان تتمخطر والغفلة زارعة في الديوان قرع أخضر ، الوزة من قبل الفرح مدبوحة والعطفة من قبل النظام مفتوحة ، مصر العظمى اللى الدبابات البريطانية حاصرت قصر عابدين وأرغمت فاروق على تعيين النحاس رئيس للوزراء وإلا سيتم عزله ، مصر العظمى بتاعة الحرس الحديدى المخصص لاغتيال خصوم الملك حتى لو واحد منهم زى رفيق الطرزى بينافسه على حب رقاصه ، مصر العظمى المنتهك سيادتها لخدمة المجهود الحربي البريطانى فى الحرب العالمية الثانية ، مصر العظمى بتاعه الكتاب الأسود لمكرم عبيد عن فساد الوفد وتحكم فؤاد سراج الدين وزينب الوكيل فى النحاس العجوز ، مصر العظمى اللى مات عشرات الألوف من شعبها بسبب وباء الكوليرا فى الأربعينيات لنقص الأمصال بسبب خواء الخزينة من الأموال بعدما الإنجليز خدوها وأدونا سندان بدالها!! مصر العظمى المهزومة فى حرب 1948 أمام العصابات الصهيونية مما ترتب عليه ضياع 78% من أرض فلسطين التاريخية ، مصر العظمى اللى أم فاروق وإخواته سافروا أمريكا وتنصروا هناك وفاروق أسقط عنهم الجنسية واستولى على ممتلكاتهم!! مصر العظمى مصر فضائح فاروق فى دوفيل وفى النوادى الليلية!! مصر العظمى مصر الفلاح صاحب الجلباب الأزرق الواحد!! مصر العظمى اللى النحاس باشا السبعينى فى أخر وزارة ترأسها سنة 1950 طلب فيها من الملك الفاسد فاروق أن يسمح له بتقبيل يده!! فى سقوط أخير ومدوى لحزب الوفد بعدما سيطر عليه كبار الملاك!!مصر العظمى مصر اللى مشروع حكومتها القومى سنة 1951 هو مكافحة الحفاء!! مصر العظمى مصر إقالة الوزارات برشاوى للملك من مليون جنيه وأنت طالع!! مصر العظمى مصر حريق القاهرة وعجز الميزانية سنة 1952 بأكثر من 38 مليون جنيه!! مصر العظمى مصر دفع جزية لتركيا حتى بعد زوال خلافة بنى عثمان!!

مصر العظمى اللى كان بيمتلكها 7000 واحد منهم 960 مصري فقط بينما 22 مليون لا يمتلكوا شئ!!